طريقة عمل الكنافة والقطايف

كل سنة و انتم طيبين

و بالصيام في الحر دا مستمتعين

و بعد الفطار محليين

بكنافة و قطايف معتبرين



ايه رأي الستات الحلوين الشاطرين يدخلوا يكتبوا طريقتهم في عمايل الكنافة و القطايف

هابدأ معاكم بالكنافة و بعدين القطايف


نص كيلو كنافة

كوب سمن سايح

نص كوب سكر

4 اكواب لبن

معلقتين طعام نشا

معلقتين طعام دقيق

علبة قشطة المراعي او علبة كريمة لباني لو كنتوا في مصر زي حالاتي كده


نقص الكنافة و بعدين نضيف عليها كوب السمنة و نفركها كويس لحد ما يمتزجوا تمام

نضع باقي المكونات ما عدا القشطةو نقلبهم على البارد و بعد كده نرفعهم على النار و نقلبهم بهدوء لحد ما المزيج يتقل و بعد كده نضيف علبة القشطة و نقلب كويس و بعدين نشيلهم من على النار و نسيبهم على جنب

ندهن صينية متوسطة سمنة و نقسم الكنافة و نوزعها في الصينية و بعدين نصب فوقها الخليط السابق و بعدين نرص باقي الكنافة و نساويها

نحطها في فرن يكون سخن و نسيبها من نص الي ساعه الا ربع او لحد ما يبقى لون الوجه دهبي

لما تطلع تتقلب في طبق التقديم عشان يكون الوش بتاعها متساوي و تتسقى بشربات بارد و هي سخنة طبعا


بالنسبة للشربات ممكن تشتري الجاهز و تكبري دماغك او توجعي قلبك شوية و تعملي شربات في البيت مكون من كوبايتين سكر و كوب ماء و تسيبهم على النار لحد ما قوامه يغلظ

كان الشيف حسن مرة بيقول ان شربات الكنافة لازم يكون تقيل


دي اول طريقه

الطريقة التانية سهلة اوي و سريعه جدا و طعمها تحفة خصوصا لما نحط عليها لبن


اقراص الكنافة

نجيب طاسة ندهنها سمنة و بعدين نحط طبقة كنافة و نساويها و نرش سكر و زبيب ونحط طبقة تانية من الكنافة و نحطها على النار لحد ما القعر يبقى لونه دهبي نقلبها على الناحية التانية لحد ما لونها يبقى دهبي و نشيلها و نسقيها شربات و نكرر العملية لحد ما تخلص كمية الكنافة

بس خلاص

في طريقة تانية بالموز

نقطع الكنافة بحيث تكون طويلة و نقسم الموزة نصين

ناخد كل نص و نلفه بالكنافه و نرص في صينية و هكذا لحدالكمية ما تخلص و نحط الصينية في الفرن لحد الوش ما يبقى دهبي نطلعها و نسقيها شربات

و بالهنا و الشفا


القطايف بقى

طبعا كلنا عارفين الطريقة العادية سكر و مكسرات و تتحشي القطايف و تتقلي و تطلع تتحط في شربات مش عارفه ليه باستتقل اوي طعمها كده

باعملها بطريقة خفيفة و سهلة

باحشيها سكر و زبيب بس و تتقلي بتطلع مش محتاجة شربات اصلا جربوها كده و قولولي رأيكم

في طريقه تانية دي الاطفال بيموتوا فيها و اولهم انا

بنلف القطايف كأنها قرطاس و بعدين تتقلى و تطلع تتحط في شربات فورا

باكون مجهزة كريم شانتييه مجرد ما اشيلها من الشربات احشيها كريم شانتيية و تترص في طبق التقديم

ممكن يترش عليها فستق مفروم للتزيين

و بالف هنا و شفا

و رمضان كريم

أختى مقبولة منك بردو

يا حنون وبالهنا والشفا

جامد والله وفي تقدم انشاء الله

جميل ياروشان

تسلم ايدك